Jan 11 2016
依家唔少小朋友參加形形色色興趣班，猶如十八般武藝「能文能武」，但小朋友待人處世態度都唔可以忽略，港鐵主席馬時亨大女Christine馬露明早幾年就察覺呢方面嘅需求，創立咗名為JEMS嘅德育學校，尋日該校為擴張樓層舉辦開幕典禮，而馬時亨透露小時候事迹，就係媽媽唔鍾意佢成日「先斬後奏」踢波，教育局前政治助理楊哲安以獎貼紙，教小朋友付出先有收穫。
一大班政商名人尋日都去撐場支持該校擴張樓層儀式，包括食物及衞生局副局長陳肇始、港大醫學院院長梁卓偉同港大校委楊紫芝、教育統籌委員會前主席鄭慕智、廖創興家族新抱周瑋瑩等。
講起以前教小朋友同依家嘅分別，馬時亨話細個時父母好着重小朋友讀書成績，唔重視課外活動，又自爆係「食藤條炆豬肉大」，最記得媽媽唔鍾意佢成日掛住踢波，因此佢通常「先斬後奏」，踢完返屋企後例牌畀阿媽鬧，之不過兩母子冇隔夜仇，打完鬧完阿媽又會呵番；馬時亨太太馬王培琪就話，兩個女可能見自己好錫同好照顧一齊住嘅奶奶，所以有樣學樣，一樣咁錫佢哋兩夫婦。
楊哲安獎貼紙教付出
Christine同老公劉仲恒認為依家好多父母都忙住返工，而學校又忙住教課本嘅知識，加上現時互聯網資訊發達，因此品德同價值觀教育變得更重要，要確保小朋友將學到嘅知識，並將之向好嘅方面發揮善用。
楊哲安同太太楊張新悅則另有一套教小朋友方法。楊哲安話現今小朋友對「珍惜」同「分享」嘅概念較弱，自己同太太平日會以「獎貼紙」形式教細路，舉例指每幫手做一樣家務有一個貼紙，儲夠幾多張可以換零食，等佢哋知道要付出先有收穫。
