Jul 14 2014
前高官馬時亨位千金馬露明（Christine）與廖創興家族第三代成員廖偉芬（Jennifer）兩位靚女上周六（12日）下晝孖住去玩，不過唔係行街「濕平」，而係大熱天時去石澳後灘執垃圾搞藝術。
Jennifer今年初發起創立一個叫做「升級周末坊」嘅組織，旨在為弱勢社群服務，將舊東西改頭換面，推動可持續發展嘅生活態度，每個月都會舉辦一次活動，剛過去嘅星期六就係去石澳後灘執垃圾，然後將垃圾組裝，再創作為一件大型珊瑚礁製置藝術品。
Jennifer知道Christine係品德培養學校JEMS Learning House創辦人，於是邀請對方出席活動，Christine帶咗9個學生去，仲有30名基層家庭小朋友一齊玩。而整起呢件藝術品下半年就會拎去巡迴展覽。
